Hvað er LIFE Icewater?

LIFE Icewater er verkefni sem hlaut 3,5 milljarða króna styrk frá Evrópusambandinu til að vinna að verkefnum til að flýta fyrir og bæta innleiðingu vatnaáætlunar á Íslandi.

Verkefninu er ætlað að auka þekkingu á notkun, eiginleikum og ástandi vatns á Íslandi, að tryggja fumlausa og samhæfða stjórnsýslu í vatnamálum, bæta vatnsgæði, svo sem með úrbótum á fráveitu og hreinsun fráveituvatns, og að fræða almenning og hagaðila um mikilvægi vatns.

Með verkefninu gefst tækifæri til nýsköpunar í stjórnsýslunni með þverfaglegu samstarfi ýmissa aðila, en verkefnið er unnið ásamt 21 íslenskum samstarfsaðilum úr röðum sveitarfélaga og hinna ýmsu stofnana. Verkefnið er leitt af Umhverfis- og orkustofnun.

Styrkurinn er einn sá stærsti sem Ísland hefur fengið. Umfang verkefnanna sem samstarfshópurinn hefur sett saman er samtals 5,8 milljarðar króna en LIFE-áætlun Evrópusambandsins styrkir verkefnið um 60%.

Verkefnunum er skipt upp í sjö hluta og verða unnin á árunum 2025 til 2030.

Icewater er styrkt af LIFE-áætlun Evrópusambandsins

Ísland tekur þátt í LIFE-áætlun Evrópusambandsins, samkeppnissjóði ESB sem hefur fjármagnað verkefni á sviði loftslags- og umhverfismála frá árinu 1992.

Með þátttöku Íslands í áætluninni gefst ólíkum aðilum á Íslandi, s.s. sveitarfélögum, frjálsum félagasamtökum, stofnunum og fyrirtækjum kostur á að sækja um styrki til umhverfisverkefna á sviði LIFE-áætlunarinnar. Auk þess er hægt að sækja um rekstrarstyrki til óhagnaðardrifinnar starfsemi félagasamtaka sem styður við markmið LIFE-áætlunarinnar.

Næsta tímabil áætlunarinnar tekur til áranna 2021-2027 en þá verður lögð áhersla á fjögur meginsvið, þ.e. náttúru og líffræðilega fjölbreytni, hringrásarhagkerfið og lífsgæði, loftslagsbreytingar - aðlögun og aðgerðir og orkuskipti. Alls eru rúmlega 5,4 milljarðar evra til úthlutunar á tímabilinu.