Fræðsla um frárennsli hjá bílaleigum

Starfsfólk Isavia heimsótti nýverið nokkrar bílaleigur við Keflavíkurflugvöll til að kynna LIFE Icewater og ræða verklag við bílaþvott og frárennsli. Heimsóknirnar eru liður í fræðslu og samstarfi við rekstraraðila á flugvellinum með það að markmiði að draga úr hættu á mengun grunnvatns.

Vatn sem fellur til við bílaþvott getur innihaldið ýmis efni og því skiptir máli hvernig staðið er að frárennsli. Í heimsóknunum kynnti starfsfólk Isavia sér verklag bílaleiganna og ræddi við starfsfólk um meðal annars þjálfun og fræðslu á þessu sviði.

Heimsóknirnar veittu Isavia betri innsýn í aðstæður og áskoranir í daglegum rekstri bílaleiganna. Í lok hverrar heimsóknar var skilinn eftir upplýsingabæklingur með fræðslu um vatn og leiðir til að koma í veg fyrir að mengandi efni berist í grunnvatn.

Mynd: Isavia